“Засгийн газрын 2024-2028 оны үйл ажиллагааны хөтөлбөрийн 2.4.1.5-д “Хашаандаа сайхан амьдаръя” хөтөлбөрийг хэрэгжүүлж, эрчим хүчний хэмнэлттэй, байгаль орчинд ээлтэй амины орон сууц шинээр барих, засварлахад хөнгөлөлттэй зээл болон бусад дэмжлэг үзүүлэх эрх зүйн орчныг бүрдүүлнэ”, 2.4.1.6-д “Эх үүсвэрээ бие даасан болон хэсэгчилсэн байдлаар шийдвэрлэсэн, байгаль орчинд ээлтэй, эрчим хүчний хэмнэлттэй амины орон сууцны нийлүүлэлтийг нэмэгдүүлэхэд чиглэсэн бодлого хэрэгжүүлж, дэмжлэг үзүүлнэ”, 2.4.1.7-д “Гэр хорооллын иргэдэд эрчим хүчний хэмнэлттэй амины орон сууц барьсан тохиолдолд 30 сая төгрөгийн санхүүжилтийн дэмжлэг үзүүлнэ” гэж тус тус заасныг хэрэгжүүлэх ажлын хүрээнд “Амины орон сууцны мэдээллийн төв”-ийг байгуулж үйл ажиллагааг эхлүүлж байна.Тус төв нь: Гамшигт тэсвэртэй, эрчим хүчний хэмнэлттэй, ногоон барилгын шаардлагад нийцсэн, агаар, хөрс, орчны бохирдлыг бууруулсан, дэвшилтэт технологи бүхий нэг айлын орон сууцны зураг төсөл, материал, тоног төхөөрөмжийн нийлүүлэлт, үйлдвэрлэл, барилга угсралттай холбоотой цогц мэдээллийг нэг цонхны үйлчилгээгээр авах боломжийг бүрдүүллээ. Иргэд хямд үнээр амины орон сууц барих, ипотекийн зээлд хамрагдах боломжийг бүрдүүлэх зөвлөгөө мэдээлэл өгөх, мэргэжил арга зүйн туслалцаа үзүүлэх цогц үйлчилгээг олон нийтэд сурталчлах зорилгоор “АМИНЫ ОРОН СУУЦНЫ МЭДЭЭЛЛИЙН ТӨВ”-ийг байгуулж, үйл ажиллагааг эхлүүлж, өнөөдөр /2024.12.18/ нээлтээ хийж байна.Амины орон сууцны мэдээллийн төв байгуулагдсанаар
• зураг төсөл,
• Барилгын материал, бүтээгдэхүүн
• Банкнаас олгож буй зээл, тусламжийн мэдээлэл
• Дэд бүтцийн сайн шийдлүүд болох, тоног төхөөрөмжийн үйлдвэрлэгч, нийлүүлэгч нарын мэдээлэл
• барилга угсралт, зөвлөх үйлчилгээ үзүүлэгчийн мэдээлэл зэрэг
#цогц_мэдээллийг_нэг_цонхны_үйлчилгээгээр нэг байршлаас_авах боломж бүрдэж байна.
Хаяг: Саппорагийн уулзварын баруун урд талд байрлах, Еco build megastrore төв
